Python喺商界嘅10個用處 10 uses of python in business

呢個世代，就算你唔係電腦工程師，唔係IT狗，都會聽過身邊嘅人提及「python」。Python究竟係乜嘢呢？

其實Python係一種程式語言，即係用嚟寫programme嘅語言。程式語言有好多種，其他包括Java（經常聽到/見到Javascript）、C、PHP等等，就好似你寫一篇文章，你可以選擇用英文、中文、日文、法文、俄羅斯文等等。而Python之所以近年喺眾多程式語言之中跑出，係因為對新手而言最容易學，用途又夠廣泛。唔講唔知，好多我哋日常用開嘅app，例如instagram、Uber都係用Python寫！以下落嚟我哋一齊睇下世界各地嘅人點樣運用Python嚟做生意啦！

1. 網絡發展
   Python可配合Django或Flask建立網頁，而且足夠強大，能夠處理極大瀏覽量，Pinterest、instagram同Reddit就係好好嘅例子。
   
   
2. 開發手機應用程式（Mobile Apps）

雖然Python本身冇內置手程應用程式嘅開發功能，但可以配合KIVY、PyQt等程式建立手機應用程式。

3. 建立圖像用戶界面（graphical user interface）

同上，Python可配合Tkinter、PyQt、KIVY等建立圖像用戶界面：https://www.youtube.com/watch?v=_-LKQvmG8Uc

4. 機器學習（Machine Learning）
   Python可以用嚟建立機器學習框架，例如Uber就運用咗Python建立強大嘅演算法，一步一步令客人同司機之間嘅溝通越來越順暢。
5. 自動化測試
   工程師可以利用Python寫程式為網頁或應用程式做自動化測試，搵出網頁或應用程式嘅漏洞或弊處：https://www.youtube.com/watch?v=dxBRH3NChEg

6. 數據分析
   工程師可將Python嵌入網站或應用程式做數據分析，甚至乎因為Python係開放源碼（open source），網上已經有好多現成碼可以直接嵌入網頁運用，採集數據協助開發。
7. 即時軟件（Real-time Software）
   Python亦可以用嚟寫電腦遊戲，可以做到即時軟件，例如透過互聯網對打等，而文中提及過嘅所有其他用Python編寫嘅軟件都係即時運作。
8. 跨國合作
   好多由線上連接到線下嘅程式，例如Uber，都需要同每個國家或地區嘅本地軟件工程師合作，所以需要倚賴一個共同語言去寫好程式。而Python就好似日常語言中嘅英文咁，受世界各地廣泛使用，基本上每個國家都可以搵到熟悉Python嘅工程師幫手，所以Uber亦選用咗Python作為佢哋嘅程式語言。
9. 區塊鏈（Blockchain）運用
   工程師可以以少於50行Python碼建立最簡單嘅區塊鏈，而之後各用戶亦可以喺區塊鏈上做動作而唔需要一個中間人做管理員。
10. 建立金融科技（Fintech）程式
    好多大銀行，例如JP Morgan、花旗銀行，都會運用Python去訓練數據分析師去準確咁評估風險。

如果你都有興趣學寫程式或者想學多樣技能嚟增強自己嘅競爭力，學Python係個好好嘅選擇。用途廣，又易學，得閒研究吓，寫啲簡單程式，重可能可以幫你提升工作效率添！