點解僱主會問「你喺邊度見到我哋請人㗎？」

其中一個原因係佢哋真係好奇想知，但係佢哋亦都想知到你係有目標咁搵工，唔係漁翁撒網。即使你其實份份工都報名，報咗百幾份工等住睇吓邊啲有回音，都唔好俾佢知道。佢哋想知道佢哋喺你心中係重要嘅，所以唔好俾佢知道佢只係你呢個漁翁捉咁多條魚返嚟嘅其中一條。

‍

以下係你應該答嘅嘢：

1）招聘網站

你積極咁搵緊工，而咁啱見到呢份適合你嘅職位。

‍

2）朋友介紹

例如你有朋友或者識得嘅人喺呢間公司做，而佢哋介紹你報考呢個職位。

‍

3）新聞來源

例如你睇報紙、文章或者新聞稿見到呢間公司正喺度擴展業務或招聘中，然後你直接聯絡呢間公司。

‍

4）獵頭公司

你搵咗一間獵頭公司，而佢哋認為你適合呢個職位。

‍

5）直接聯絡

你因為有興趣或者係行家而知道有關呢間公司嘅嘢，希望加入呢間公司，所以直接自薦，睇吓有冇啱自己嘅職位。

‍

以下嘅嘢，千祈唔好答呀：

1）唔好搞到自己聽落好猴擒

唔好令自己聽落只係想求其搵一份工，乜嘢工都啱。就算呢個係事實，見工期間要令對方覺得你係有原因先至會報考呢份工，所以面試之前最好做定資料蒐集，搵定一系列呢份工適合你或者你喜歡呢份工嘅原因。

‍

2）唔好唔知自己想做乜

有清晰目標嘅應徵者通常都會更加積極面對工作，所以你可以花少少時間思考一下呢一點，或者想像下你希望有一份點樣嘅工。

‍

3）唔好講大話

其實係唔好俾人識穿。如果你講一個佢哋冇用過嘅招聘平台，佢哋一聽就會知你亂噏。唔合乎事實嘅嘢唔好講。

‍

要誠懇，但唔需要同對方交心。你唔需要發生乜嘢事都一五一十講晒俾對方知，尤其係關於你搵其他工嘅經歷。花少少時間諗吓有啲乜嘢講咗會對自己有利同不利，諗清楚先好答。亦都可以諗吓有啲乜嘢問題可以問返僱主，令佢哋覺得你對呢份工好有興趣。