冇電腦工程學位都可以成為軟件工程師？ How to get a Software Developer Job without a CS Degree

如果呢個世界嘅職業分兩類，一類就係需要考牌需要一定嘅專業知識，例如醫生律師水電工等等。另一類就係唔需要考牌、冇話邊啲特定嘅學位先可以做嘅，例如marketing、Business Management、大部份sales等等。而軟件工程師就有少少特別，雖然要做到一個軟件工程師必須要有某啲特定嘅知識，但係唔需要考牌嘅。所以，就算你冇相關嘅學位，要入行，始終都唔係真係咁難。

就算你冇一個學位，你仍然可以用其他方法去證明俾僱主睇你係有咁嘅實力。以下係一啲可以放入你嘅作品集入面嘅嘢。當然，以下嘅嘢唔係一朝一夕可以儲得到。分分鐘你要花上一至兩年甚至更長嘅時間。

1）作品集

因為你冇一個電腦工程學位，僱主只能夠睇你做過嘅嘢去判斷你嘅能力。一個軟件工程師嘅作品集通常會係一個網頁嘅形式，例如網誌，集合晒你以往寫過嘅其他網頁、應用程式同埋比較小型嘅project等等。僱主好有機會會開你啲程式編碼嚟睇，所以記住放上去交俾人之前執整齊同執靚仔啲啊！

2）個人Project

其實應徵軟件工程師同例如插畫家、翻譯、文字工作者嘅道理都一樣，未有人請你去為任何一間公司做嘢嘅時候，你可以自己開一啲你有興趣嘅project俾自己做。例如寫啲簡單嘅遊戲、用自己嘅方法將另一個網頁排返出嚟、寫一啲會方便到你自己生活嘅應用程式等等。呢啲所有嘢都可以擺入你嘅作品集，除咗俾人睇到你coding有幾叻之外，亦都可以令人明白你平時日常生活之中對啲乜嘢有興趣，了解您多啲。

3）Open Source Project

到你對自己嘅能力有咗一定嘅信心，可以開始參加一啲Open Source Project。呢啲project就好似一個同唔識嘅人戴住面具咁合作去做一件事，當中你會遇到好勁嘅人，亦都會遇到需要你去幫助嘅人，係好好嘅學習機會。參與更多open source project，擴闊你嘅視野，到將來你需要加入一間公司去做嘢嘅時候，亦都會順暢好多。當然，你亦都可以將呢啲project列喺你嘅作品集入面，都會加分㗎！

4）網上討論區

而家有好多網上討論區或者Telegram Group，集合左一啲對某種程式語言有興趣嘅人士，喺嗰度，你可以搵到唔同程度嘅工程師，可以問佢哋關於投身呢個行業嘅專業意見。大部份亦都會好樂意去俾啲指引你。

最後，唔好諗住做軟件工程師就可以日日對住部電腦坐埋一二邊寫寫寫寫寫！無論係初創企業定係大企業，軟件工程師都要同好多唔同人合作，要具備良好嘅溝通能力。所以，去接觸下唔同人都係準備好自己去迎接新挑戰嘅好方法！