1. 目標清晰 為自己定下目標

Grad Job係你事業嘅起點，所以第一份工做邊行好重要。Send CV之前先諗好自己嘅目標。例如行業、工種、期望薪酬等等。有咗清晰嘅目標，會冇咁容易迷失方向，清楚自己要如何準備搵工。定下目標之後，就可以重點為向你目標嘅行業準備啦。不過，留意返，每個行業都有佢哋獨特嘅要求，除咗自己嘅意願，都一定要記得考慮實際嘅條件呀。例如，如果你想搵一份廣告業嘅工，如果你本身科目唔係商科、Marketing相關，都應該要有相關嘅經驗，例如你曾經就過相關嘅實習、自己營運嘅一個facebook／YouTube， 或者IG shop 等等。如果你完全無相關嘅經驗，HR都難以說服老闆見你喇。另外，你定立咗期望薪酬之後，都最好上網或者向已經入咗行嘅師兄姐打探一下通常入職薪酬係幾多。如果唔係期望薪酬同市價相差太遠，公司未深入認識你之前，可能已經將你篩走咗啦。

2. 為每份Application 度身訂造一份 CV

即使係同一個行業同工種，都未必每一個opening都係一樣架。所以每份求職信同CV都要度身訂造，每份工save一個新嘅文件。可以留意個招聘廣告上面嘅Job Description，就可以知道公司其實搵緊咩類型嘅人。如果你認為自己有啲機會，不妨可以考慮將招聘廣告上面Job Description嘅字融入去CV入面，以顯示你就係佢哋搵緊嘅人選啦！不過，融入還融入，記得要自然少少，太多或者太明顯比人印象都唔太好，以為你係好似為咗應付見工所以先咁寫，唔得誠實。

另外，記得寫CV嘅時候將相關嘅經驗排先，例如你之前係想類似嘅過公司實習過，就可以排前啲；如果你大學讀嘅科目同佢哋嘅Job Description吻合，可以將教育擺先。呢度有更多寫履歷嘅小貼士。

然後，當你send CV有一定數量，最好就開一個Excel，記低自己Send左幾多份CV。一目了然，咁你唔會因為只係不停Send無回音而搞到心慌慌嘛。即時未搵到工之前，都會清楚自己嘅進度，適時可以調整目標。

3. 求職信技巧

Cover Letter都有技巧架喎。首先，你份Cover Letter同CV都要為每份工度身訂造，Cover Letter上面要撮要地介紹你自己。記得唔好寫得太長，大概200字就夠架啦，太多會令HR覺得你長氣，失去耐性，又會唔清楚你嘅優勢就好難揀你。你試下代入間公司角度，佢會想要咩人？你嘅CV對呢間公司又有邊啲吸引嘅地方？簡短咁介紹你同概括公司應該考慮你嘅原因就可以啦。不過，記得書寫嘅語氣要好啊，唔係「老奉」要人請，話晒都係新丁，謙虛啲人哋都睇得舒服啲。

再參考下呢度嘅範例，俾心機寫好呢封信！

最後，就係要提醒大家記得要保持良好心態。搵工重要，但都唔好容易迷失，見工就Send。亂Send去唔啱嘅公司只會令自己浪費時間，更添挫敗感。所以搵工之前記得諗清楚自己想要啲咩。祝各位畢業生前程似錦！