Project Manager項目經理就聽得多喇，咁產品經理(Product Manager)又係乜呢？佢哋係一件新產品由研發到推出市場嘅負責人。產品經理負責提升產品嘅質素，研究產品喺市場上嘅定位，分析市場調查嘅數據，總之產品由設計到生產到推出市場都係由佢哋負責嘅。
項目經理同產品經理最大嘅分別就係：產品經理係決定產品要向咩方向發展，而項目經理就係確保產品真係向決定咗嘅方向發展，而且監察住所有做出嚟嘅嘢都符合本身原定嘅時間表同埋預算。
產品經理最重要嘅職責就係扶持一件新產品推出市場。以下嘅幾樣科技知識，產品經理一定要識！
數據採集及分析
喺設計一件新產品之前，最重要係要搵出新產品喺市場嘅價值。究竟市場係咪真係有呢個需求呢？做咗個產品出嚟有冇人買呢？市面上有冇其他類似嘅產品已經推出左呢？產品喺首階段推出後，或者要搵一堆用家試用，又要收集佢哋嘅用後感，究竟產品係咪切合佢哋需要呢？產品係咪有效咁樣做到佢應該有嘅功用呢？最後，當產品正式推出市面後，亦要做好多跟進嘅市場調查，不斷提升產品喺市面上嘅競爭力。雖然作為產品經理，你係帶領一組人幫你完成以上種種，但所有資料同數據分析嘅知識你都一定要熟悉，先至可以帶領一組人有效咁將產品推出市場。
而且，分析數據需要用上大量唔同嘅軟件，產品經理對數據分析軟件嘅認識亦都會直接影響佢工作嘅效率。
樣板製作
產品經理唔係工程師，唔需要識得點樣整一個電子產品出嚟，但產品經理作為一個工作小組嘅主腦，必須要認識樣板製作嘅原理同過程。產品經理必須要喺成個過程中以明確嘅方向帶領團隊，並且可以清楚咁指出每一個樣板有啲乜嘢要改善，所以就住唔同嘅產品，產品經理都需要有唔同嘅知識。
測試技巧
產品經理做嘅所有決定都需要有充分嘅理據支持，除咗以上嘅數據分析同採集嘅技巧得來嘅數據，產品經理更加要喺市場上用唔同嘅測試技巧試水溫，採集更加多嘅數據。
編程技巧
同製造產品嘅知識一樣，產品經理未必需要真係識得寫程式或者審視程式，但係產品經理一定要明白所有程式運作嘅原理。試諗吓，如果有軟件出錯，或者因為軟件嘅漏洞而令到產品有瑕疵，產品經理如果完全對編程知識一竅不通，就好難講出產品有啲咩問題，亦都好難同工程師溝通。所以產品經理亦都一定要有基本嘅編程知識。
因為軟件嘅漏洞而令到產品有瑕疵，產品經理如果完全對編程知識一竅不通，就好難講出產品有啲咩問題，亦都好難同工程師溝通。所以產品經理亦都一定要有基本嘅編程知識。
同所有公司入面嘅帶領者一樣，產品經理都係一個要同唔同隊員溝通嘅角色，所以產品經理必須要有高嘅理解能力同溝通能力，先可以將一間公司唔同嘅零件適當咁擺埋一齊，再帶領大家好好咁運作，將產品由想像入面帶到市場嘅尖端。
